Saç tökülməsi və kövrəklik çox vaxt düzgün qidalanma ilə əlaqələndirilmir. Lakin mütəxəssislər bildirirlər ki, gündəlik rasion saçların keyfiyyətinə birbaşa təsir göstərir.
AzFood “Çempionat”a istinadla xəbər verir ki, trixoloq və dermatoveneroloq Eduard Buçarov saç sağlamlığı üçün vacib qidaları sadalayıb.
Həkimin sözlərinə görə, saçlar zülal-yağ təbiətinə malikdir və onların quruluşu qidalanmadan asılıdır. Qida maddələri nazik kapilyarlar vasitəsilə follikullara çatır və bu səbəbdən gündəlik menyu saçın möhkəmliyinə təsir edir. Ekspert bildirib ki, sağlam saçların formalaşması üçün rasionda hər gün kifayət qədər zülal və faydalı yağlar olmalıdır.
Buçarovun sözlərinə görə, menyuda yumurta, süd məhsulları, balıq, ət, qoz-fındıq, tumlar və bitki mənşəli zülal mənbələri yer almalıdır. O qeyd edib ki, yalnız əsas qidalar deyil, həm də vitamin və minerallarla zəngin məhsullar vacibdir. Tərəvəzlər, göyərti, meyvələr və müxtəlif taxıllar maddələr mübadiləsini dəstəkləyir və baş dərisinin vəziyyətini yaxşılaşdırır.
Trixoloq xüsusilə sink və dəmir elementlərinə diqqət yetirməyi tövsiyə edib. Onun sözlərinə görə, bu maddələr saçın strukturunun qorunmasına kömək edir və ən asan ət və dəniz məhsullarından əldə olunur. Həkim bildirib ki, vegetarian və vegan qidalanma zamanı bəzən saç tökülməsi, quruluq və kövrəklik halları daha çox müşahidə edilə bilər.
Ekspert əlavə edib ki, saçın tərkibində təxminən 10 faiz su var və bu, elastikliyi qorumaq üçün vacibdir. Kifayət qədər su qəbulu həm də saç köklərinin qanla təchizatını yaxşılaşdırır və böyümə prosesinə müsbət təsir göstərir.
Bununla belə, Buçarov vurğulayıb ki, hər bir problem yalnız qidalanma ilə həll olunmur. O, saçla bağlı davamlı problemlər zamanı özbaşına müalicədən çəkinməyi və mütləq mütəxəssisə müraciət etməyi tövsiyə edib. Həkimin fikrincə, düzgün diaqnoz və peşəkar yanaşma sağlam və güclü saçların əsas şərtidir.
