Baş ağrısı hər insanda eyni şəkildə özünü göstərmir və gündəlik həyatda miqren adlandırılan ağrıların heç də hamısı miqren olmaya bilər. Baş ağrısının xarakteri, yerləşməsi, fiziki hərəkətlə dəyişməsi və yanaşı əlamətlər onun hansı tipə aid olduğunu müəyyənləşdirmək baxımından mühüm ipucları verə bilər.
AzFood “Çempionat”a istinadla xəbər verir ki, Sankt-Peterburqdakı “Euroonko” klinikasının nevroloqu Yelena Jurakovskaya miqreni gərginlik tipli baş ağrısından fərqləndirən xüsusiyyətləri açıqlayıb. Mütəxəssisin sözlərinə görə, klassik miqren zamanı ağrı daha çox başın bir tərəfində yaranır, döyüntülü xarakter daşıyır və orta və ya yüksək intensivlikdə olur. Fiziki hərəkət və gücənmə ağrını artıra bilər. Miqrenə ürəkbulanma, qusma, işığa və yüksək səslərə həssaslıq da müşayiət oluna bilər. Belə zaman insanın qaranlıq və sakit otağa çəkilib uzanmaq istəməsi xarakterikdir. Miqren tutması adətən bir neçə saat davam edir və yuxudan sonra yüngülləşə bilər, lakin bəzi hallarda fasilələrlə üç günə qədər uzana bilər.
Həkim miqrenin digər mühüm xüsusiyyətlərindən birinin aura olduğunu da qeyd edib. Aura tutmadan əvvəl, adətən bir saatdan çox olmayan müddətdə meydana çıxır və daha çox görmə ilə bağlı dəyişikliklər – göz önündə işıqların, “milçəklərin” və ya şimşəkvari görüntülərin yaranması, görmənin pozulması ilə özünü göstərə bilər. Daha nadir hallarda keyimə, dəridə qarışqa gəzməsi hissi və qoxulara qarşı dəyişikliklər müşahidə olunur. Miqreni gərginlik tipli baş ağrısından fərqləndirən əsas cəhətlərdən biri də budur: gərginlik baş ağrısı adətən başın hər iki tərəfində hiss edilir, sıxıcı və ya təzyiqedici xarakter daşıyır, sanki başı “dəbilqə” və ya “halqa” sıxırmış kimi hiss yaradır və fiziki hərəkətlə adətən güclənmir. Bununla belə, bəzi insanlarda hər iki tip baş ağrısı növbə ilə və ya müxtəlif vaxtlarda müşahidə oluna bilər. Tez-tez təkrarlanan, xarakteri dəyişən və ya əvvəlkindən daha güclü olan baş ağrılarında səbəbi dəqiqləşdirmək üçün həkim müayinəsi vacibdir.
