Gündəlik qida rasionunda duzdan normadan artıq istifadə etmək bir çox insanın fərqinə varmadığı ciddi sağlamlıq problemlərinə yol açır. Vanderbilt Universitetinin tədqiqatçıları müəyyən ediblər ki, hər gün qəbul edilən natriumun miqdarı müəyyən həddi aşdıqda ürək öz funksiyasını yerinə yetirməkdə çətinlik çəkir.
Amerika Kardiologiya Kollecinin elmi nəşrində yer alan məlumata görə gündəlik natrium qəbulunun 4 000 milliqramı keçməsi ürək çatışmazlığı riskini kəskin artırır.
25 mindən çox insanın iştirak etdiyi genişmiqyaslı təhlillər göstərir ki, bir çox insan gün ərzində orta hesabla 4 269 milliqram natrium qəbul edir. Bu rəqəm tibbi baxımdan tövsiyə olunan 2 300 milliqramlıq normadan təxminən iki dəfə yüksəkdir. Bədənə daxil olan natriumun əsas qaynağı isə adi süfrə duzudur. Ekspert qrupu müəyyən edib ki, bu səviyyədə duz qəbulu ürək çatışmazlığı ehtimalını 15% yüksəldir.
Həmçinin rasiona əlavə edilən hər 1 000 milliqram natrium xəstəlik riskini daha 8% artırmaq gücünə malikdir.
Alimlər bildirirlər ki, yeməklərdə duzun miqdarını cüzi də olsa azaltmaq gələcəkdə yarana biləcək ağır fəsadların qarşısını almaq üçün ən sadə və effektiv yoldur. Hesablamalara əsasən natrium qəbulunu 4 000 milliqramdan aşağı salmaq növbəti onillikdə ürək xəstəlikləri statistikasını əhəmiyyətli dərəcədə yaxşılaşdıra bilər. Kiçik bir vərdiş dəyişikliyi illər sonra ürəyinizin daha sağlam qalmasına kömək edəcək.
