Xroniki stress insanın qidalanma davranışına ciddi təsir göstərə bilər. AzFood bildirir ki, uzun müddət davam edən psixoloji gərginlik bəzi insanlarda güclü aclıq hissinin yaranmasına və zərərli qidalara meylin artmasına səbəb olur.
Məlumata görə, Piroqov Universitetinin Klinik Tibb İnstitutunun poliklinik terapiya kafedrasının assistenti, psixoloq və terapevt həkim Ulyana Maxova bildirib ki, stressin insan orqanizmində yaratdığı reaksiyalar fərqli şəkildə özünü göstərə bilər. Onun sözlərinə görə, kəskin və qısa müddətli stress əksər hallarda iştahanı azaldır. Lakin uzunmüddətli, yəni xroniki stress vəziyyəti əksinə, insanlarda aclıq hissini gücləndirə və daha çox qida qəbuluna səbəb ola bilər.
Mütəxəssis qeyd edir ki, bu zaman insanlar adətən sağlam qidalardan deyil, yüksək kalorili və zərərli qidalardan istifadə etməyə meylli olurlar. Bu isə artıq çəki, metabolik problemlər və digər sağlamlıq risklərinin artmasına səbəb ola bilər.
Ulyana Maxovanın sözlərinə görə, güclü aclıq hissinin yaranmasının digər səbəblərindən biri də uşaqlıq dövründə formalaşan davranış modelləridir. Bəzi insanlar emosional gərginlik zamanı qida qəbulunu bir növ rahatlaşma vasitəsi kimi qəbul etməyə alışırlar. Nəticədə stress və narahatlıq zamanı avtomatik olaraq yeməyə üz tuturlar.
Ekspert bildirir ki, bu cür halların qarşısını almaq üçün ilk növbədə emosional aclıqla fiziki aclığı bir-birindən ayırmağı öyrənmək lazımdır. Onun fikrincə, insan öz qidalanma davranışına diqqət yetirməli, hansı hallarda həqiqətən ac olduğunu, hansı hallarda isə sadəcə emosional səbəbdən yemək istədiyini müəyyən etməlidir.
Psixoloq həmçinin vurğulayır ki, stressin idarə olunması, gündəlik həyat tərzində balansın qorunması və şüurlu qidalanma vərdişlərinin formalaşdırılması bu problemin qarşısını almaqda mühüm rol oynayır.
