Qidalanma ilə bağlı aparılan araşdırmalar göstərir ki, yeməyin tərkibi ilə yanaşı onun görünüşü də insanın iştahasına təsir edə bilər. Mütəxəssislər bildirirlər ki, qidaların rəngi bəzən insanın nə qədər yemək istəyəcəyinə belə təsir göstərir.
AzFood BBC Future saytına istinadla xəbər verir ki, qidalanma psixologiyası üzrə mütəxəssis Çarlz Spensın sözlərinə görə, parlaq və təbii rənglərə malik yeməklər insanlarda daha çox maraq yaradır. Xüsusilə qırmızı, narıncı və sarı rəngli qidalar beynin iştaha ilə bağlı reaksiyasını gücləndirə bilər.
Mütəxəssis qeyd edir ki, yaşıl rəngli qidalar isə çox vaxt sağlam qidalanma ilə assosiasiya olunur və bu səbəbdən insanlarda daha müsbət təsəvvür yaradır. Buna görə də bir çox restoran və qida istehsalçıları yeməklərin təqdimatına xüsusi diqqət yetirirlər.
Araşdırmalara görə, müxtəlif rəngli tərəvəz və meyvələrin rasiona daxil edilməsi həm qidalanmanı daha balanslı edir, həm də yemək prosesini daha cəlbedici və maraqlı hala gətirə bilər.
