Fiziki məşqdən sonra bir stəkan südün sağlamlıq üçün əhəmiyyətli təsiri ola bilər. Xüsusilə yaşlı insanlar üçün bu vərdişin faydalı olduğu bildirilir.
AzFood “Çempionat”a istinadla xəbər verir ki, çinli alimlər məşqdən sonra süd qəbulunun sümükləri möhkəmləndirdiyini və sınıq riskini azaltdığını müəyyən ediblər.
“Journal of Nutrition, Health and Aging” jurnalında dərc olunan araşdırmada qeyd edilir ki, güc məşqlərinin süd qəbulu ilə birləşdirilməsi dayaq-hərəkət sistemi üçün daha yaxşı nəticə verir. Tədqiqatda 60 yaşdan yuxarı 82 sağlam könüllü iştirak edib. Onlar səkkiz həftə ərzində həftədə üç dəfə güc və tarazlıq məşqləri proqramına qatılıblar.
İştirakçılar dörd qrupa bölünüb: yalnız məşq edənlər, məşq və qidalanma təlimi alanlar, məşq və təlimdən sonra inək südü içənlər, həmçinin məşq və təlimdən sonra soya südü qəbul edənlər. Səkkiz həftə sonra bütün qruplarda yerimə sürətinin artdığı müşahidə olunub.
Lakin ən böyük irəliləyiş məhz məşqdən sonra inək südü içən və qidalanma üzrə maarifləndirici dərslərdə iştirak edən qrupda qeydə alınıb. Xüsusilə əl sıxma gücündə artım diqqət çəkib. Alimlər bildirirlər ki, bu göstərici diabet, depressiya və digər xəstəliklərin riski ilə əlaqəli mühüm marker sayılır.
Mütəxəssislər vurğulayırlar ki, məşqdən sonra bir stəkan süd içmək osteoporozun profilaktikası və yaşlılıq dövründə hərəkətliliyin qorunması üçün sadə və əlçatan üsul ola bilər. Süd zülal və kalsiumla zəngin olduğu üçün əzələ və sümük toxumasının bərpasına dəstək verir.
Araşdırma müəllifləri qeyd edirlər ki, düzgün fiziki aktivlik və balanslı qidalanma birlikdə tətbiq edildikdə daha effektiv nəticə əldə olunur. Buna görə də, xüsusilə 60 yaşdan yuxarı şəxslər üçün müntəzəm məşq və süd qəbulu faydalı vərdiş kimi qiymətləndirilir.
