Son illər həzm və immunitet üçün geniş təbliğ olunan probiotik əlavələrlə bağlı mühüm xəbərdarlıq edilib.
Bir çox insan bu məhsulları tam təhlükəsiz hesab etsə də, mütəxəssislər onların hər kəs üçün uyğun olmadığını bildirirlər.
AzFood Eating Well-ə istinadla xəbər verir ki, probiotik əlavələr universal faydalı vasitə sayılmır və əksər hallarda onların istifadəsinə ehtiyac olmur.
Mənbəyə görə, Amerika Qastroenteroloji Assosiasiyası bildirir ki, insanların böyük əksəriyyəti probiotik qəbul etmədən də sağlam bağırsaq fəaliyyətini qoruya bilir. Həzm problemlərinin müalicəsində bu əlavələrin effektivliyini təsdiqləyən kifayət qədər klinik sübut yoxdur.
“Gastroenterology” jurnalında dərc olunan araşdırmada isə qeyd edilib ki, bəzi konkret probiotik ştammları antibiotik qəbulu zamanı yarana bilən Clostridioides difficile bakterial infeksiyasının riskini azalda bilər. ABŞ-lı qastroenteroloq Trisha Pasricha Eating Well-ə açıqlamasında bildirib ki, sağlam mikrobiom infeksiyalardan qorunmağa kömək etsə də, antibiotiklər bu tarazlığı poza bilər. Onun sözlərinə görə, probiotiklər yalnız müəyyən hallarda və düzgün seçildikdə faydalı ola bilər.
Ekspert vurğulayıb ki, insanlar bəzən şişkinlik, qarın ağrısı və ya digər əlamətlərin əsas səbəbini araşdırmadan əlavə qəbul etməyə başlayırlar. Halbuki lif qəbulu, bağırsaq hərəkətliliyi, stress və qidalanma rejimi kimi amillər daha böyük rol oynaya bilər. Davamlı ağrı, səbəbsiz çəki itkisi və ya qanaxma kimi əlamətlər olduqda isə probiotik həkim müayinəsini əvəz etməməlidir.
“Microorganisms” jurnalında dərc olunan məqalədə qeyd olunur ki, bütöv və təbii qidalar bağırsaq sağlamlığı üçün daha geniş fayda təmin edir. Xüsusilə fermentləşdirilmiş məhsullar – kimçi, turşu kələm, kefir, miso və canlı bakteriyalı yoqurt mikrobiomu dəstəkləyir. Liflə zəngin meyvə, tərəvəz, tam taxıllar, paxlalılar, qoz-fındıq və toxumlar da faydalı bakteriyaların qidalanmasına kömək edir.
Mütəxəssislər əlavə seçərkən tərkibdə konkret ştammların göstərilməsinə diqqət yetirməyi tövsiyə edirlər. Çünki probiotiklər ştamm-spesifik təsir göstərir və hər birinin funksiyası fərqli ola bilər. Həmçinin məhsulun saxlanma şəraiti və klinik araşdırmalarla təsdiqlənməsi də vacib göstərici sayılır.
Qeyd edilir ki, probiotiklər sağlam insanlarda ümumilikdə təhlükəsiz hesab olunsa da, qəbulun əvvəlində yüngül şişkinlik yarada bilər. Bahalı məhsulun daha effektiv olması isə zəmanət deyil – əsas meyar elmi sübut və düzgün dozadır.
